Elhuyar Fundazioa - Hizkuntza Zerbitzuak 

Zer da hizkuntza-kalitatea? 

Hizkuntza-zerbitzuaren ontasun edo kalitate hori deskribatu edo definitzeko orduan, kalitatearen bi osagaiak agertzen dira: "teknikoa" eta "funtzionala":

• Kalitate teknikoa izateak, hizkuntza-zerbitzuen alorrean, esan nahi du hizkuntza kalitatekoa izatea.
• Kalitate funtzionala ere ezinbestekoa da, hau da, ez da nahikoa kalitateko hizkuntza izatea bezeroa gogobetetzeko. Zerbitzu osoa hartu behar da kontuan, eta, hortaz, inguruko faktore osagarriek ere garrantzia dute.

Zerbitzuaren kalitatea nolabait parametrizatzeko, xehatu ahal izateko eta, ahal izanez gero, neurtzeko, adierazleak daude:

• Zerbitzuaren kalitate teknikoa esatea, gure kasuan, hizkuntza-kalitatea esatea da.
• Kalitate funtzionalaren adierazleak, berriz, hainbat dira: salneurriak, epeak betetzea, bezeroaren formatuak (papera, dokumentu elektronikoa, web gunea, ahozko testua), saldu osteko zerbitzua...

Hizkuntza-kalitatearen orotariko ikuspegi edo definizioa behar da, jakina, baina ez da ahaztu behar, hizkuntza-zerbitzuak eskaintzen dituen erakunde batean, hizkuntza-kalitatearen bezeroaren araberako ikuspegia ere badagoela, hau da, bezeroak bere hizkuntza-irizpideak betetzea eska dezake, eta irizpide horiek aldatu egin daitezke bezerotik bezerora.